Feedback Badi Merligen 22.8.2015

Hey folks,

Wo mir letscht Jahr z’Merlige i dr Badi hei adieu gseit, hei mir no nid gwüsst ob die neue Pächter üsi Blues & Rock Night i däm Rahme wärde wyterfüehre. D’Zuesag vom Vroni und Andy aafangs Badisaison het üs mega gfreut.Das mir aber e so n’es irrsinnig schöns Ambiente aatraäffe het üs d’Sprach verschlage. Vo dr Belüüchtig über d’Chleidli vo de hübsche Waitresses zu dr Deko uf de Tische eifach nume Chapeau…..U ne Organisation wo’s nüt – aber o gar nüt uszsetze gäh het.

Ä ganz härzliche Dank a ds AHOI Badi Bistro Team, d’Metzgerei Brand in Sigriswil, Mele, Budi, Simu, Tinu u Pole für ds Bühni ufboue. Ohni Euch alli wär so ne Event gar nid müglech. Einisch meh isch es zur Grande Fiesta im Palmedorf worde.

Äs het sech glohnt dr Gig um ne Wuche z’verschiebe so nes Troumwätterli wi mer hei gha – Thanks a lot Petrus. 300 Lüt si id Badi cho u hei mit üs abgfiiret. Uf de Tische u dä Bänk si si gstande u näb dr Bühni hei si gschwoofet.

Dank o a Swissmusicservice und am Marco für dä satt Supersound wo d’hesch abgmischt. So fägts äbe…..Das mir o das Jahr dr Polo Hofer wider bi üs uf dr Bühni hei dörfe ha isch no z’Tüpfli uf em i gsii. Rundume e super gfröiti Sach – mit einere Usnahm – mir hei o das Jahr wider es Bandmitglied müesse verabschide. Es isch üse Bassischt Stalyn Olivo wo leider us bruefliche Gründ nümme regelmässig mit üs cha üebe. Mir danke ihm no einisch für si Iisatz über di letschte zwöi Jahr.

Wär z’nächscht Jahr ds Badibeizli füehrt isch no unklar. Anyway, mir hoffe mir dörfe nächschts Jahr wider für Euch alli z’Merlige spile.

See you…..

Dänu Lüthi
PUR-JAM

Bildergalerie → Badi Merligen 22.8.2015

Veranstalter → AHOI Badi Bistro Merligen


Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.

*

*