Wow folks…….das isch e mega-giga-hammermässige Gig gsii geschter i dr Badi z’Merlige. Äs Wätter wi usem Bilderbuech. Wenn öppis grägnet het de si das nume Komplimänt gsi – Merci viumau! Es super Publikum u es Ambiente wo eim d’Muulegge automatisch ufezieht – die Badi isch proppevoll gsii. E Mischig us Merliger, Uswärtige u Tourischte. Sogar üsi Fans us Holland si cho…. U was am meischte fägt vom Teenager bis zu dä Pensionierte hei alli der Plousch gha. Ä super schöni Summerparty hei mir mit Euch chönne fiire. Schön sit Dir alli derbi gsii.

U üsi zwe Neuzuegäng Bruno Kyburz und Stalyn hei üse Level dütlich ufegschrubt…..Freude herrscht. Das Ganze isch mit meh Druck derhär cho – yeah Stalyn – u ds Volk het gseit dä Säxlerer isch oberheiss. No comment Brünu!

E Badicrew wo alli Erwartige übertroffe het – Merci Roselyne, Jerry, Hanspeter u allne andere Hälfer.

Accidentally hei mir für dä Gig e Ersatzmischer müesse sueche u mir hei eine gfunde – u de was für eine! Dr „Schwan“ isch äxtra vom Openair Gampel zu üs uf Merlige cho u het e Sound abgmischt vom fiinschte – Thanks a lot you did a great job.

Warum mache mir de Musig? Wüll mir Fröid hei wenn Dir Föid heit. Das isch üs geschter definitiv glunge – drum hei mir hüt so sunnigi Gringe.

Hey Lüt – so fägts eifach – Merci, merci , merci…….u bis zum nächschte Mal.

Dänu Lüthi
PUR – JAM

Bildergalerie → Badi Merligen 17.8.2013

Veranstalter → Seebad Merligen